نــوێ
سەرەتا / ئەدەب / هۆنراوە / ( با ) خوازبێنی گوڵی کرد !!

( با ) خوازبێنی گوڵی کرد !!

(( دیارییە بۆ :  مینو . ئەفسانە. ازربایجان قیزی ))
قوبادی جە لی زادە

١
زستان کڵاوی بەفر ،
چاکەت و پانتۆڵی (( ئاو )) ی لەبەر دایە .
بۆیمباخێکی بەستووە لە چلورە .

٢

پایز بە پرووشەی باران خۆی ششتوە
کراسی کزەبای پۆشیوە .
گەڵایەکی زەردی داوە لە یەخەی .
بەتەمای گەشتی دارستانە .

٣
رەشەبا ، پۆتینی گەڵای لەپێ کردووە .
تراکسوودێک لە گوڵی وەریو .
نێوچاوانی بەستووە بە ھەور .
لەنێو چەقی دارستاندا ، وەرزش دەکات !

٤
( با ) خۆی نەخوێندەوارە ،
کەچی ھەموو بەیانییەک دەستی بەفر دەگرێت
بۆ قوتابخانە .

٥
رەشەبای دوو گیان ،
لە نێو باخچەکەماندا منداڵێکی بوو ،
ناومان نا : شــــــــــــــــــــــــــــــنە .

٦
گوڵ لە دادگای وەرزدا ،
شکاتی کرد لە ( با ) .
(( با، ستیانە کانمان دەفڕێنێ .
کراسەکانمان ھەڵدەداتەوە ))

٧
(( با )) لەبن دارھەمێیەک دانیشتووە ..
گەڵا وەریوەکان دەژمێرێت !

٨
زەماوەندی درەخت و بارانە
(( با )) سەما دەکات.
چیا بە دەسماڵی تەمەوە ، سەرچۆپی کێشە .

٩
کزەبا ، بازنی پایزە .
بەفر لووتەوانەی زستان.
گەڵا گەردانەی بەھارە .
پووش حجیلی ھاوین .

١٠
پاڵ بە خۆرەوە دەنێم
تا زووتر ئاوا بێت .
ئەمشەو لەگەڵ مانگدا ژوانم ھەیە .
( ئۆە ..ھەردوو دەستم ھەڵپڕووان ! ))

١١
رەشەبا بەشەق ، دەرگای ژوورەکەی کردەوە ..
چراکەی کوژاندەوە .
بلوورەکەی شکاند !

١٢
شەو لە دەمەو ئێوارەوە ،
چاوی خاک
بە کل دەرێژێت  .

١٣
خودا ، خۆرێکی لە دەست
ش ک ا ……
………
بوو بە ملیارەھا ئەستێرە .

١٤
ھەور ، زنجیری پانتۆڵەکەی کردۆتەوە
بە پێوە میز دەکات !

١٥
خۆر عەرەقی کردۆتەوە ….
لە تاوا ،
چۆتە بەر سێبەری مانگ .

١٦
ئەستێران  بە رۆژ نوقمی ھەتاون
شەوانەش لە سەرمانا ،
ئاگر دەکەنەوە !

١٧
بۆکرووز دێ …
فریادی کەڵەشێرە ،
کراسی شەو دەسووتێنێ .

١٨
(( با )) خوازبێنی گوڵی کرد …
باران گوتی :
باغ ژن نادات بە رەشەبا !!

١٩
بەرەبەیان ، ئاسمان
ھەموو ئەستێرەکانی لێ رژایە دەریاوە .
ئەو ماسیە سپی و بچووک بچووکانە ،
ئەوانن !

٢٠
( با )) دەست و پەنجەی ،
لە ئاوی رووبار تەڕ دەکات .
دەم و چاوی دارستانی پێ دەسڕێ .

دەربارەی CHRA.TV

چراتێڤی.. پێگەیەکى هونەرى و رۆشنبیریى ئەلکترۆنی ئازادو سەربەخۆیە، رۆژانە لەپێناو پەرەپێدانى ئەم بزاوتە لەکوردەواریدا خۆى نوێدەکاتەوەو، با نووسەرانی کوردیش ڕەها بن لە هەربەربەست و سانسۆرێک کە ڕێگرن لە بەردەم تەقینەوەی بەهرەو داهێنانەکانیان. چراتێڤی..هەناسەو نەفەسى هەموو ئەو مرۆڤانەیە دەنگ بوون و دەنگ دەمێنن لەڕوداوە کۆمەڵایەتی و سیاسییەکانی جیهان و کوردستان. لێرەوە رایدەگەیەنین جگە لەو بابەت و بڵاوکراوانەى لۆگۆى چرایان بەسەرەوەیە چرا بەرپرس نییە لەناوەرۆکى بابەت و بڵاوکراوەکان.