دوو شه‌ممه‌, تشرینی یه‌كه‌م 26, 2020

سەما

مەرگ، شوێن و ساتی بۆ نییە

هەروەها (سەما) ش.

بەبیستنی مۆسیقایەك

ڕٶحی خۆمی ئاوێزان دەکەم

پڕبەدڵی خۆم سەما دەکەم،

کێ دەڵێ سبەی..

پێیەکانم سەما هەڵدەگرێ.. کێ؟؟

کەی بمەوێت

زۆر شێتانە،سەما دەکەم

.. سەما نەبێ

نە خۆر، لە خۆرهەڵاتەوە هەڵدێ

نە لە خۆرئاواوە ئاوادەبێ.

نە دڵ..

مانای عاشبوون دەزانێ

نە پەپوولە

بەدەوری شەمدا دەسورێ،

نە.. هەنگ،تامزرۆی

مژینی هەڵاڵەی گوڵ دەبێ

.. سەما نەبێ

سەرمای زستان و

گەرمای هاوین،

مرۆڤ، دەتەزێنێ،

دەپڕوکێنێ.

پێکی مەستانە، سەما

دەسا وەرە ئەی خانمەکەم

هەتا ماوین .. سەما بکەین.

سەما،

پیریی و گەنجێتیی نازانێ

گەر ..

گوێبیستی مۆسیقای ( زۆربا) ببی و

سەما نەکەی

دڵنیابە

ئەتۆ شێتی،

بۆیە..

هەر مەرگ، لە(سەما) م ، دەخات

دەنا، هەرچوار وەرزە

هەتا مابم

سەما دەکەم.

 

 

فەتاح حەسەن

دانیمارك /ڤالبی

2019

دەربارەی CHRA.TV

چراتێڤی.. پێگەیەکى هونەرى و رۆشنبیریى ئەلکترۆنی ئازادو سەربەخۆیە، رۆژانە لەپێناو پەرەپێدانى ئەم بزاوتە لەکوردەواریدا خۆى نوێدەکاتەوەو، با نووسەرانی کوردیش ڕەها بن لە هەربەربەست و سانسۆرێک کە ڕێگرن لە بەردەم تەقینەوەی بەهرەو داهێنانەکانیان. چراتێڤی..هەناسەو نەفەسى هەموو ئەو مرۆڤانەیە دەنگ بوون و دەنگ دەمێنن لەڕوداوە کۆمەڵایەتی و سیاسییەکانی جیهان و کوردستان. لێرەوە رایدەگەیەنین جگە لەو بابەت و بڵاوکراوانەى لۆگۆى چرایان بەسەرەوەیە چرا بەرپرس نییە لەناوەرۆکى بابەت و بڵاوکراوەکان.