چوار شه‌ممه‌, كانونی یه‌كه‌م 1, 2021
نــوێ
سەرەتا / ئەدەب / هۆنراوە / کورتەنامەی شیعریی

کورتەنامەی شیعریی

بەشی چواردەم

 

هەڵاڵەی گوڵ و هەنگین

ڕۆژێك ئەتۆ..

ڕۆژێك ئەمن.

***

خۆزگە بمتوانیبا

لەدوای تۆ،

کەسێکی ترم خۆشویستبا،

چیبکەم..

بەدەستخۆم نییە،

ناتوانم،نا.

***

کە، دەتگووت ( ئم )،

هەر ( ئم ) ێکت

دێڕی کاڵەوەبووی ڕۆمانێك بوو

چاپ و ژمارەی تیراژەکەی،

بێپایان بوو.

***

هەروەك چۆن

کەڵەشیریش نەخوێنێ

ڕۆژ، هەر دەبێتەوە

ئاوا دەزانم.. بەیەك ناگەین

بۆ سەبوریی بەخۆدان

هەرکەسێکی ترم بوێ

ناوی تۆی لێدەنێم

چون.. هەر مەجنونەو،

لەیلای خۆی هەیە.

***

زویردەبم

زویردەبی

لێمان زویر دەبن خەڵکی،

ئەوەی هەرگیز

ناشێ و نالوێ

دابڕانە ،بەیەکجاری.

***

پێش تۆ..

وامدەزانی

کەس نییە وەك من بەکوڵ بگری

کە، ئەشکی تۆم دی،

تێگەیشتم..

فرمێسکی سوێری بەخۆوە نەدیوە

هەردوو جاوانم.

***

جێمدێڵی بۆ کۆشك و تەلار؟!

بێخەمبە.. زۆر نابا

لە هەواری

یەکەم ژووانمان

ماچێکی تەڕوپاراو

دەکەمە دەستپێکی یەکەم دیدارمان

لەتەك ئەو کیژەی

کوختی خۆشەویستیی پێ بەهاترە

لەکۆشك و تەلار.

 

 

فەتاح حەسەن

دانیمارك/ڤالبی

 

دەربارەی CHRA.TV

چراتێڤی.. پێگەیەکى هونەرى و رۆشنبیریى ئەلکترۆنی ئازادو سەربەخۆیە، رۆژانە لەپێناو پەرەپێدانى ئەم بزاوتە لەکوردەواریدا خۆى نوێدەکاتەوەو، با نووسەرانی کوردیش ڕەها بن لە هەربەربەست و سانسۆرێک کە ڕێگرن لە بەردەم تەقینەوەی بەهرەو داهێنانەکانیان. چراتێڤی..هەناسەو نەفەسى هەموو ئەو مرۆڤانەیە دەنگ بوون و دەنگ دەمێنن لەڕوداوە کۆمەڵایەتی و سیاسییەکانی جیهان و کوردستان. لێرەوە رایدەگەیەنین جگە لەو بابەت و بڵاوکراوانەى لۆگۆى چرایان بەسەرەوەیە چرا بەرپرس نییە لەناوەرۆکى بابەت و بڵاوکراوەکان.