کەی ..؟

کە، گوێبیستی دەنگت دەبم

هەروەك ..
مۆسیقارێکی مەشلول

کە، گوێبیستی،
ئاوازێکی ناوازەی خۆی دەبێ،

گیانم دێتە جۆش وخرۆش
کەی بێ دووبارە، گوێبیستی دەنگت بم .. کەی ؟

***

کە، حەز بەتاریکیی دەکەم

وانەزانی کە، هاوڕازی

کوندەپەپووم،

حەز بەتاریکیی دەکەم

چون .. ئەستێرە

لەتاریکییدا نەبێ

کەی، دەردەکەوێت .. کەی؟!

***

گەر، نەزانی..

کەی، وە بۆچی دەگڕێم
چ فایدەیە، بزانیت

کەی و بۆچی پێدەکەنم .. کەی!!

***
خۆزگە بەو دەمانەی کە، سەردەمی سەر بوو
نەهامەتییەکان،

کەی وەك ئێستا..

روو لەسەر بوو.. کەی؟
***
بەبێ هاوڕێ و ژن و مەی
ئەم ژیانە، کەی ژیانە.. کەی ؟
***
تۆیەك
مەی نەخۆیتەوە،

سەما نەکەی
سەفەر نەکەی
کەی دەتوانی، بەتۆزی پێی
گەڕیدەیەکی سەماکەری مەینۆشدا، بگەی.. کەی ؟
***
لێگەڕێن دەسا با نەی هەر بناڵێ
کەنگێ دەگات، بە ناڵەی دڵی من.. کەی ؟
***
کەی ..
ترپەی باران و هاژەی روبار
دەگەن بە خەندە و پێکەنینی تۆ.. کەی

***
کە، من تەمەنی جوانیم لەسایەی تۆدا، بەهەدەردا
کەی رەوایە، دڵی تۆ بۆ کەسێکی تر لێبدا .. کەی؟
***
لە هەندیک شوێن، لە هەندێك کات
شەرمنانە خۆشتدەوێم
بەڵامدا، لە شوێن .. لە کات
کەی ئەمانە،
بە خۆشەویستی، ئاشنان .. کەی ؟!
***
لەم پوچی ژیانەمدا چاوەڕوانی،

فریادڕەسم
رۆح بکات ، بەبەری شەکەتمدا
دەبێ كێ بێ و دەبێ کەی بێت .. کەی؟؟
***
رەشەبا زیندووە
ئەی ئەوە نییە لورەی دێت.
دەریا زیندووە
گوێ بۆ شەپۆلەکانی رادێرە
منیش زیندوم..
گوێ لە ناڵەی دڵم بگرە
کەی رەشەبایەك .. ناڵەی دڵم و شەپۆلەکان
تێکەڵ دەکات..کەی؟
***
دڵم دەشکێنی، گلەیی ناکەم
کە، تۆ دڵت بەرد بێ
گلەیی لەبەرد، کەی کراوە .. کەی ؟

***

لێمببورە، ناتوانم من دڵت دەمێ

ئەتۆی زاڵم..

کەی مانای عاشقبوون دەزانی .. کەی ؟!

 

فەتاح حەسەن

دانیمارك/ ڤالبی

دەربارەی CHRA.TV

چراتێڤی.. پێگەیەکى هونەرى و رۆشنبیریى ئەلکترۆنی ئازادو سەربەخۆیە، رۆژانە لەپێناو پەرەپێدانى ئەم بزاوتە لەکوردەواریدا خۆى نوێدەکاتەوەو، با نووسەرانی کوردیش ڕەها بن لە هەربەربەست و سانسۆرێک کە ڕێگرن لە بەردەم تەقینەوەی بەهرەو داهێنانەکانیان. چراتێڤی..هەناسەو نەفەسى هەموو ئەو مرۆڤانەیە دەنگ بوون و دەنگ دەمێنن لەڕوداوە کۆمەڵایەتی و سیاسییەکانی جیهان و کوردستان. لێرەوە رایدەگەیەنین جگە لەو بابەت و بڵاوکراوانەى لۆگۆى چرایان بەسەرەوەیە چرا بەرپرس نییە لەناوەرۆکى بابەت و بڵاوکراوەکان.