سەرەتا / ئەدەبی / پەساپۆرتی سەفەرێکی نامۆ 

پەساپۆرتی سەفەرێکی نامۆ 

شەونم زەندی – هەولێر

دەنگێک لە ناخەوە : ” ئێوارەیەکی نامۆیەو” ،

هەموو شتێ لە بەر چاوتا .. نامۆ دیارن …

هەر خۆتی و

لە نێو چوار دیواری ژوورەکەتا …

بە دیار تەرمی هیواکانتا

فرمێسکی سوور هەڵدەڕێژی …و

هێدی هێدی …

بە سەر ئەم تەرزە مەرگەت …

چرکەکانی کاتژمێری عومری بەهار نەدیوت …

دەژمێری و میلی کاتژمێری ژوورەکەت …

بە ئاوازە خەمناکەکەی ناخت

هاوبەشی ئەم خەمەتە …

تۆش بێ هوودە …

یادەکانت … لە ناو دڵتا دەنێژی

تابلۆی داهاتووی ڕەشت … وا لە بەر چاوەو

چاک دەزانی ….

هەر ئەم شەوەت بە دەست ماوە ….

سبەی ئازارستانێک

دوورگەیەکی ئێجگار نامۆیەو

چاوەڕوانتە ….

هەر ئەم شەوەت بە دەست ماوە

ئەم ئازارستانە نامۆیە نامۆیە … چاوەڕوانتە ……

بێ ئەوەی ” ڤیزەی ئەم سەفەرەت ” بڕیبێ …

پەساپۆرتی کۆچکردنت لە دەستایە …

پەساپۆرتی کۆچکردنت لە دەستایە و

ئۆقرەت نەماوە ….

چاک دەزانی …

گەر دڵت هاواری کرد ….

پەردەی بێ دەنگی دڕی ….

‘” چەقۆی ئازار ‘” سێبەری لێ کردوویت و

بە تۆمەتی یا خیبوونت

دڵی پڕ سۆزت … شەق دەکات

نا چار ….

چارەنووست دەدەیتە دەست قەدەری شوومی

لێک دابڕان …

ڕووەو هەواری خەم …

چە پکێک ئازاری تر و ” کۆتەڵی خەمی نوێ ”

سەرباری خەمەکانت دەبێ ،

تا هە تایە …لە ” دوورگەی ئاوارەیی ”

بە پە ساپۆرتی ئەم سەفەرەت

دە گۆڕییەوە ” خەونت ، هیوات ..”

ئەسەف ” کچی ناسۆر ” چ سەردەمێکە ؟

” خەون و هیواکانت ” بە پە ساپۆرتی ئەم سەفەرەت

دەگۆڕییەوە ….

چ سەردەمێکە ” کچی ناسۆر ”

لە یا خی بوون … بسڵەمییەوە ؟

گەر ئەمڕۆ یاخی نەبیت …

سبەی بێ شک …نامۆتر دەبیت …

نەکەی ” کچی ناسۆر ”

سوجدە بۆ ” وەرزی وەرین ”

ببەی ….

نەکەی…

بەم ڕازیبوونەت ” دەرگای ڕەهایی ”

بە ڕووی هیواکانت داخەی …

نەکەی….

دوورگەی نامۆ ….

بکەی بە هەواری تازەت ….

تۆش مرۆڤیت …

خاوەن هەست و چاو و دڵ و بیری خۆتیت …

ببە بە دەنگ …

بە زریانی تووڕەیی …

دنیا پڕکە بانگی سەربەستی

ورە بەرز … هەنگاو بنێ ….

ببە بە ڕەنگ …

بە ” نیگای خۆرێکی گەش ”

شەوی تاریک ڕاو بنێ .

٨ /٣ /١٩٩٩

دەربارەی CHRA.TV

چراتێڤی.. پێگەیەکى هونەرى و رۆشنبیریى ئەلکترۆنی ئازادو سەربەخۆیە، رۆژانە لەپێناو پەرەپێدانى ئەم بزاوتە لەکوردەواریدا خۆى نوێدەکاتەوەو، با نووسەرانی کوردیش ڕەها بن لە هەربەربەست و سانسۆرێک کە ڕێگرن لە بەردەم تەقینەوەی بەهرەو داهێنانەکانیان. چراتێڤی..هەناسەو نەفەسى هەموو ئەو مرۆڤانەیە دەنگ بوون و دەنگ دەمێنن لەڕوداوە کۆمەڵایەتی و سیاسییەکانی جیهان و کوردستان. لێرەوە رایدەگەیەنین جگە لەو بابەت و بڵاوکراوانەى لۆگۆى چرایان بەسەرەوەیە چرا بەرپرس نییە لەناوەرۆکى بابەت و بڵاوکراوەکان.

هەروەها ببینە

مجروم… شاعیر و فەرمانبەر و پیشەزان

یاسین برایم زۆر جار دەوترێت کورد شاعیری زۆرن، ڕەنگە دیوێکی ئەم قسەیە ڕاست بێت ، …