سەرەتا / ئەدەبی / کێ هەیه ئەم منداڵه نە ناسێ

کێ هەیه ئەم منداڵه نە ناسێ

#هاوار_تەیب

ئەم منداڵه نە ناسراو نییه
لەم کەونەدا گەڕیدەکە
هەر ڕۆژەی له شارێكە
ڕۆژێک لە ئۆرشەلیمە
نزا بۆ پاکبوونەوە دەکات
ڕۆژێکی دی لە پاریسە و
دەپرسێ ئێرە شاری تیرۆرکردنی ناسنامەی منە
شەوێکیان میوانی تارانە و خەریکی لابردنی ماسکەکانە
بەيانییەک لە ئەنقەرە سەر خەوێک دەشکێنێ و
دەڵێت:ئازادی دیل ناکرێ و
پەیامێک ئاڕاستەی بەغدا دەکا و
ئێژێ وڵات بە خوێن ئاو نادرێ
لە دیمەشقەوە هاوار دەکات
سەرۆک ئەوە ڕۆژی ڕەشی تۆیە
کە پەپوولەکان بە ئاسمانتا نافڕن و
بیرکردنەوەکانت دیلی جەنگن.

 

ئەم منداڵە
گەڕێدەیەکی عاشقه
له مهاباد و ماردیندا به دوای ئازادیدا
له هەڵەبجه به دوای هەناسەیەکی بێ بۆنی سێو
له لالش به دوای ناسنامەی منداڵانی دوای شەڕ ئەگەڕێ
له کوبانی بەدوای خەندەی سەر لێوی دایکیدا
دەگەڕێ.

ئەو منداڵە
گەڕیدەیەکه بۆ ژیان نزا دەکا
گەڕیدەکی ڕووتە وەک ڕووتی حەوا
ئەو نازانێ سەر بە کام ڕەگەزە و
بۆ هێندە دەگەڕێ
ئینسانیبوونی ئەو منداڵە
لە حەقیقەتی مێژووەوە هاتووە و خەون دابەش دەکات
وەهم
 تا ئەوجی بیرکردنەوە
دیل دەکات.

 

گەڕیدەیی ئەو کۆنترە لە مێژوو
گەڕیدەیی ئەو کۆنتره له شەڕ

پێش شەڕ بانگەوازی ژیانی کرد
پێش باران گوڵەگەنمێك بوو
پێش تفەنگ عاشقێکی وێڵ بوو.
گەڕیدەیەک بوو لە چوار کانی ئاوی خواردەوە،
بەڵام هێشتا تینوو بوو.
ئاوێنەیەک بوو
دەم و چاوی ڕاستەقینەی مێژووی خۆی تیادا دەبینی.
ئێستاش ئاوارەیەکە لە باخچەکانی پووچگەراییەوە
وەهمەکانی تۆ باڵ دەکات و

لە پشت پەنجەرەکانەوە خەیاڵ تا ئەوجی نغرۆبوون لە لای هابیل و قابیل دیل دەکات.

#ڕانیه
#هاوار_تەیب

 

دەربارەی CHRA.TV

چراتێڤی.. پێگەیەکى هونەرى و رۆشنبیریى ئەلکترۆنی ئازادو سەربەخۆیە، رۆژانە لەپێناو پەرەپێدانى ئەم بزاوتە لەکوردەواریدا خۆى نوێدەکاتەوەو، با نووسەرانی کوردیش ڕەها بن لە هەربەربەست و سانسۆرێک کە ڕێگرن لە بەردەم تەقینەوەی بەهرەو داهێنانەکانیان. چراتێڤی..هەناسەو نەفەسى هەموو ئەو مرۆڤانەیە دەنگ بوون و دەنگ دەمێنن لەڕوداوە کۆمەڵایەتی و سیاسییەکانی جیهان و کوردستان. لێرەوە رایدەگەیەنین جگە لەو بابەت و بڵاوکراوانەى لۆگۆى چرایان بەسەرەوەیە چرا بەرپرس نییە لەناوەرۆکى بابەت و بڵاوکراوەکان.

هەروەها ببینە

دە بێرەوە

سەردار جاف-ئەڵمانیا دەبێرەوە جگەر سوتاوی دوێنێم لە خەم و بێداری ڕابووم، ھەناسەم لە شنەی دەریاوە …