CHRA.TV

Voorbeeld-HTML-pagina

ئامادەبووانى ئێستا 40 میوان

ئێواران که‌ ته‌نیا ده‌مێنم

ئێواران که‌ ته‌نیـا ده‌مێنم

له‌ زه‌رده‌پـه‌ڕی ڕاده‌مێنــم

به‌ ئاســمانی هه‌نده‌رانـدا

مه‌لـی غه‌ریـبیـم ده‌فڕێـنم

 

ئێواران که‌ ته‌نیـا ده‌مێنم

جه‌سته‌ و گیان ده‌ترازێنم

له‌ پێ ده‌شــتی خه‌یاڵانـدا

هه‌مـوو ســنورێ ده‌به‌زێنم

 

 

ئێواران که‌ ته‌نیـا ده‌مێنم

چرکه‌سات باڵ ده‌‌وه‌‌شـێنم

له‌ جیا خاکی کیشوه‌راندا

ته‌نێ له‌ وڵات ده‌ینیشێنم

 

 

ئێواران که‌ ته‌نیـا ده‌مێنم

بـۆ دۆسـت و یـار ده‌ناڵێنم

به‌ کۆڵانه‌ی ته‌نگی ‌شـاردا

چاوی حه‌سره‌ت ده‌گه‌ڕێنم

 

ئێواران که‌ ته‌نیـا ده‌مێنم

گه‌رای ئــازار ده‌تروکـێنـم

ته‌زوو‌ به‌ ته‌وقی سه‌رمـدا

له ‌بنی پێیان ده‌رده‌هێنم

 

ئێواران که‌ ته‌نیـا ده‌مێنم

کاس و که‌وه‌ڕێ داده‌مێنـم

له‌ نامـۆیی بـێ ڕه‌نگی دا

هه‌مـوو چشـتێ ده‌تۆرێنـم

 

ئێواران که‌ ته‌نیـا ده‌مێنم

بێ ده‌نگـم که‌س نـادوێنـم

قوڵپی گریـان له‌ گـه‌روودا

به‌ هه‌نیسکان ده‌تاســێنم

 

 

ئێواران که‌ ته‌نیـا ده‌مێنم

هه‌ستی مانـدوم ده‌لاوێنـم

دڵه‌م‌ بـاجی غـوربـه‌تی دا

بۆ شه‌وئازار ڕای ده‌هێنم

 

ئێواران که‌ ته‌نیـا ده‌مێنم

بوخچه‌ی کۆچ ده‌رده‌هێنم

به‌‌ناو وێسـگه‌ی یاده‌کاندا

میلی ساتێک ده‌وه‌سـتێنم

 

ئێواران که‌ ته‌نیـا ده‌مێنم

مۆمی عه‌شقێ ده‌گیرسێنم

له‌به‌ر سه‌مای گڕی ئه‌ودا

پێکی دووری هه‌ڵـده‌هێنم

 

ئێواران که‌ ته‌نیـا ده‌مێنم

سه‌ر خه‌یاڵی بۆ ده‌شکێنم

له‌ وشه‌کاری وێنه‌ جواندا

شیعری تازه‌ش‌ داده‌هێنم

 

 

ئێواران که‌ ته‌نیـا ده‌مێنم

چه‌می چاوم هه‌ڵده‌ستێنم

هه‌رچی خه‌مێ له‌ هزرمدا‌

له‌ ناو ئه‌شـکا ده‌خنکێنـم

 

ئێواران که‌ ته‌نیـا ده‌مێنم

شێتانه‌ هه‌رخۆم ده‌دوێنم

له‌ تاریکی شه‌وه‌زه‌نگ دا

چۆلگه‌ی ناخ ده‌زرینگێنم

 

ئێواران که‌ ته‌نیـا ده‌مێنم

به‌هره‌ و توانایم ده‌نوێنم

وه‌ک که‌ناری له‌به‌ندی دا

سۆزی شیوه‌ن ده‌چریکێنم

 

ئێواران که‌ ته‌نیـا ده‌مێنم

خونچه‌ی وشه‌ ده‌پشکوێنم

له‌ نێو به‌سته‌و‌ گۆرانی دا

ئاوازێکی خۆش ده‌چڕێنم

 

 

ئێواران که‌ ته‌نیـا ده‌مێنم

ده‌س له‌ئه‌ژنۆ وه‌رده‌هێنم

له‌ گۆشه‌ی خه‌ڵوه‌ی نزادا

ساغی سـۆراخه‌ ده‌خوێنم

 

ئێواران که‌ ته‌نیـا ده‌مێنم

ده‌ست و چه‌ناگه‌‌ ده‌گوێنم

به‌ دالغـه‌ی یه‌که‌م ژواندا

نیگاو خه‌نده‌ به‌بیر دێنم

 

ئێواران که‌ ته‌نیـا ده‌مێنم

ده‌سته‌کانم تێک هه‌ڵدێنم

به‌م گوشاری ده‌روونیه‌ دا

گرێ ی په‌نجان ده‌ته‌قێنم

 

ئێواران که‌ ته‌نیـا ده‌مێنم

هێنده‌ به‌دبه‌ختی هه‌و‌ێنم

‌له‌پاڵ کێشمه‌ی‌‌ ڕاڕایی دا

لێوم به‌ ددان ده‌ڕوشـێنـم

 

 

ئێواران که‌ ته‌نیـا ده‌مێنم

چاو عاشقانه‌ هه‌ڵده‌هێنم

به‌ره‌و قیبله‌کـه‌ی تابـاندا

درودی ئه‌وین به‌دی دێنم

 

ئێواران که‌ ته‌نیـا ده‌مێنم

به‌قوڕگی قومری ده‌خوێنم

بۆ هێـلانه‌ی به‌جـێ ماودا

پوشکه‌ی‌ خه‌یاڵ ده‌کشێنم

 

ئێواران که‌ ته‌نیـا ده‌مێنم

پشکۆی‌ ناخ کڵپه‌ ده‌سێنم

پشتم له ‌تاو حه‌شمه‌تیـدا

وه‌ک تای گۆپاڵ داده‌هێنم

 

ئێواران که‌ ته‌نیـا ده‌مێنم

هه‌ر‌ یاده‌خه‌و ده‌تان بینم

له‌ تۆپکی خوشه‌ویستی دا

ساتی‌ یادتان به‌خێردێنم

 

 

ئێواران که‌ ته‌نیـا ده‌مێنم

په‌روانه‌ و مۆمـی ده‌نوێنم

له‌ شـه‌وژوانی عاشقان دا

ته‌نێ هه‌ر خۆم ده‌سوتێنم

 

ئێواران که‌ ته‌نیـا ده‌مێنم

بۆ سه‌ردانی ڕۆح ده‌هێنـم

به‌خۆشڕه‌وی نه‌رمه‌ تاودا

ئه‌سپی خه‌یاڵ ناسره‌وێنم

 

ئێواران که‌ ته‌نیـا ده‌مێنم

خۆزگه‌ و بریام ڕاده‌ژێنـم

بۆ گۆبه‌ندی شه‌و چه‌ره‌دا

هه‌ناسه‌ ‌ئاخ هه‌ڵـده‌هێنم

 

ئێواران که‌ ته‌نیـا ده‌مێنم

سۆمای چاوان نـاچووقێنم

پێڵوه‌‌ تروکه‌‌ به‌سه‌ریه‌کدا

له‌ مۆله‌ق داده‌چه‌سـپێنم

 

 

ئێواران که‌ ته‌نیـا ده‌مێنم

ماچی ڕۆژ و‌ خاک ده‌بینم

به‌ تاوه‌ حه‌زی تامه‌زرۆدا

باوه‌ش به‌ڕۆحتان دادێنم

 

ئێواران که‌ ته‌نیـا ده‌مێنم

زۆر ڕۆمانسی خه‌یاڵهـێنم

وه‌ په‌پوله‌ی‌ خاڵ له‌باڵـدا

په‌یام به‌ گوڵ ده‌گه‌یه‌نـم

 

ئێواران که‌ ته‌نیـا ده‌مێنم

بۆنسۆی ‌سینه‌م ده‌ردهێنم

به‌رگی سـیه‌‌م له‌ هه‌ناودا

په‌ڕه‌ی‌ سیخاره‌ ده‌سوتێنم

 

ئێواران که‌ ته‌نیـا ده‌مێنم

دڵه‌که‌ی بێ نازم ده‌نوێنم

له‌جیات یاری ده‌سبازیـدا

له‌خه‌مانـم ده‌ی گه‌وزێنم

 

ئێواران که‌ ته‌نیـا ده‌مێنم

شه‌و له‌ نـاخما ده‌خه‌وێنم

به ‌ئاسوگه‌ی ئاوای شاردا

گزینگی خـۆر هه‌ڵده‌هێنم‌

 

ئێواران که‌ ته‌نیـا ده‌مێنم

پێش خه‌یاڵتـان بپچڕێنـم

له‌ دوا گه‌رده‌ن ئازایی دا

ماچ و فرمێسک ده‌پڕژێنم

 

ئێواران که‌ ته‌نیـا ده‌مێنم

ده‌ست به‌ دڵوه‌ ده‌نوسێنم

بۆ مشته‌خاکی نیشتماندا

سه‌ری نه‌وازش داده‌نوێنم

 

 

دڵشاد تاقانه‌

 

ئەم ئیمەیڵە پارێزراوە لە سپام, پێویستە جاڤا سکریپت چالاک بکەیت بۆ بینینی.