CHRA.TV

Voorbeeld-HTML-pagina

ئامادەبووانى ئێستا 122 میوان

ئەفسانە سروش: پێویستە سەیری دەق بكرێت وەك خۆی، نەك ناوی گەورە

ئەفسانە سروش، لەم چەند ساڵەی دواییدا توانیویەتی جێی خۆی لەناو چەندان كەناڵی راگەیاندندا بكاتەوە، بۆیە وەك كەسێكی راگەیاندكار ناسراوە، بەڵام لەپاڵ ئەوەدا خاتوو ئەفسانە سروش بەهۆی شیعرەكانییەوە كەبەر لە كاری راگەیاندنیش دەینووسین، خاوەن تایبەتمەندی خۆیەتی. شیعرەكانی رەنگدانەوەی واقیعی ژیانی خۆیەتی و بۆن و مەرامەی ئافرەتبوونیان لێ دێت. ئافرەتێك یاخی و هۆشیارانە

مامەڵە لەگەڵ وشەكانی دەكات. "وشە" لە دەرفەتێكدا چەند پرسارێكی ئاراستە كرد.

دنیای خوێندنەوە و نووسینت چۆن بوو؟

خوێندنەوەم بۆ گەشەپێدانی هزر و ئاگەداربوونە لەدۆخی سیاسی و كۆمەڵایەتی، نووسینیش وەك كافكا دەڵێت: بۆ چوونە دەرەوەیە لەڕیزی مردووەكان، بەگشتی من لەسەرەتایەكی ناكۆتادام، دەمەوێ خۆم خۆم بدۆزێتەوە و لەتەك خۆما ھەنگاو بنێم.

بەشێوەیەكی گشتگیر عەشق بووەتە ئامرازێك بۆ كۆمەڵێك مەرامی تاك ڕەهەندی؟

بەواتایەكی تر هەمیشە شكستی تاكەكان دەبینین بەهۆی عەشقێكی نێرەمووكەوە، ئایا عەشقی تۆ چۆن كەوتووەتەوە؟

عیشق چەمكێكی گشتییە، عیشق وەك فرۆم پێیوایە هونەرە و هەموو كەس ناتوانێت پەی پێ ببات، هەموو تاكێك بوێریی ئەوەی نییە عاشق ببێت، عیشـق بمانەوێ و نەمانەوێ ئامادەگییەكی ڕەهای هەیە لەناخدا، بەدرێژایی تەمەن لەگەڵمان دەژی، لێمان دانابڕێ.

بە ڕای تۆ گرفتی رەخنەی شیعری و رەخنەی راگەیاندنی كوردی چییە؟

رەخنەی ئەدەبی كوردی بەگشتی و شیعر بەتایبەتی وەك پێویست نییە و ڕەخنە نەبووەتە كولتوورێكی نەرم و بنیاتنەرانە، بەڵكو رەخنەی شیعر و رەخنەی راگەیاندن، رەخنەیەكە دوور لەهونەری رەخنەگرتنە، بۆیە ڕەخنەگرەكانمان لەپەنجەی دەست تێناپەڕن و وە شێواوییەك بەئەدەب و راگەیاندنەوە دیارە. ڕەخنەگری جدی و ئەكادیمیمان نییە و رەخنەگرانمان نازانن لەسەر چ بنەمایەك رەخنە دەگرن؟ ئایا پشت بە كام میتۆدی رەخنەیی بەستراوە؟ رەخنە لە هەر بوارێكدا بێت، پێویستە ئەكادیمییانە و تەكنیكی ئەدەبی تیادا بێ.

تۆ وەك ئافرەتێك كە لە هەردووك بواردا كار دەكەیت، تووشی ئەو رەخنانە بوویتەوە؟

بەڵێ زۆریش، تووشی ئەو رەخنە بێ بنەمایانە بوومەتەوە، بەڵام گوێم پێ نەداون و كاری خۆم كردووە و بە كارەكانی خۆم و بەردەوامیم، وەڵامی رەخنەكانیانم داوەتەوە، ئێمە ئەگەر گوێ بەم قسە لەرزۆكانە بدەین، دەبێ لەجێی خۆمان بوەستین، دەبێ ژیان بووەستێ، بۆیە من ئەوە بەڕەخنە نازانم و بەسەرلێشێواوی و بێبنەمایی وەسفی دەكەم. ڕەخنە لەوە ڕەگئاوەژووترە بەمەم بێ بنەماییە بووترێ ڕەخنە.

ئایا شاعیرانی گەنج چی بكەن باشە بۆ ئەوەی زیاتر لەوەی هەن بوونی خۆیان بسەلمێنن؟

پێویستە دەنگی نوێ لەهەوڵی بەدەوامدا بێ، بۆ ئەوەی خۆی بسەلمێنێ، نابێ لەوە بترسین ناوێك هات ئەوە تەواو، پێویستە سەیری دەق بكرێت وەك خۆی، نەك سەیری ناوی گەورە گەورە بكرێت.

ناوی گەورە زۆرجار ھیچی بۆ وتن پێ نییە و خەریكی خۆ دووبارەكردنەوەیە و دواییش بەناوی ئەدەب وەك ژەھر دەرخواردی خوێنەری كوردزمانی دەدەن. خۆشبەختی نووسەری كوردزمان لەوەدایە، خوێنەری كورد لەزمانی كوردی زێتر زمانێكیتر نازانێ، ئەگەر وانەبوایە نووسەری كورد جورئەتی ئەوەی نەدەكرد ئەم ھەموو ژەھرە بێ بنەمایە دەرخواردی خوێنەری كوردزمانی بدات.

تۆ هەم لە بواری راگەیاندن كار دەكەیت و هەمیش خاوەن قەڵەمێكی باشی هۆنینەوەی شیعری، ئایا ئەمانە پێكەوە تا چەند خزمەتی ناو و بەهرەی تۆیان كردووە؟

من لەهەردوو بواردا كارم كردووە و بەردەوامم، ئەوان بۆ من هەردووكیان تەواوكەری یەكن و پێكەوە ناوی منیان جوانتر كردووە، وەك چۆن شیعر پێویستی بە بوێری هەیە، راگەیاندنیش پێویستی بە بوێری هەیە، بۆیە شیعر و راگەیاندن لەمندا تەواوكاری یەكترین.

وشە/ هەولێر- هەورین نەجات