CHRA.TV

Voorbeeld-HTML-pagina

ئامادەبووانى ئێستا 46 میوان

شانۆگه‌ری (دزه‌کان هه‌موو کات له‌ ناوه‌ختدا نایه‌ن) له‌ ئه‌مستردام نمایش کرا

له‌ درێژه‌ی کاروچالاکیه‌کانی یانه‌ی کوردی "میدیــــا" له‌ هۆڵه‌ندا، ڕۆژی 14-06-2013 له‌ هۆڵی به‌ناوبانگی (ماوده‌رپۆرت تیاته‌ر) له‌ شاری ئه‌مستردام تیپی شانۆی بێسنوور، شانۆیی (دزه‌کان هه‌موو کات له‌ ناوه‌ختدا نایه‌ن) یان پێشکه‌ش کرد، ده‌قی ئه‌م شانۆییه‌، له‌ نوسینی (دارفۆ) نوسه‌ری ئیتالی خاوه‌نی خه‌ڵاتی نۆبڵ و ده‌رهێنانی هونه‌رمه‌ندی کورد باکۆ سۆرانی بوو.

سه‌ردار فه‌تاح ئه‌مین کارگێڕی ناوه‌ندی ده‌ره‌وه‌ی ڕێکخراوه‌ دیموکراتیه‌کان و سه‌رپه‌رشتیاری ڕێکخراوه‌کانی هۆڵه‌ندا ووتی: جێگه‌ی ئاماژه‌ پێدانه‌ به‌ بۆنه‌ی تێپه‌ڕبوونی 25 ساڵ به‌سه‌ر ڕوودانی جینۆسایدی ئه‌نفال و هه‌ڵه‌بجه‌ دا، ناوه‌ندی ده‌ره‌وه‌ی ڕێکخراوه‌ دیموکراتیه‌کانی (ی.ن.ک)، له‌ میانه‌ی کۆمه‌ک و پشتگیری بۆ چه‌ندین پڕۆژه‌ی هونه‌ری و که‌لتوری جددی بۆ ساڵی 2013 له‌ وڵاتی شانشینی هۆڵه‌ندا، سپۆنسه‌ری ئه‌م گروپه‌ی کردووه‌.
تیپی شانۆی بێسنوور گرووپێکی فره‌که‌لتووری هه‌مه‌ڕه‌نگه‌ له‌ نێوان نه‌ته‌وه‌ جیاوزه‌کانی هۆڵه‌ندا،‌ له‌ ساڵی 1994 ه‌وه‌ واته‌ 19 ساڵه‌ خزمه‌ت ده‌کات، بۆ ناساندنی کلتۆری کوردی به‌ هۆڵه‌ندی و بێگانه‌کانی ناو هۆڵه‌ندا.
چیرۆکی شانۆییه‌که‌ : (دزه‌کان هه‌موو کات له‌ ناوه‌ختدا نایه‌ن)، باس له‌ گیروگرفتی کێشه‌ی هاوچه‌رخی مرۆڤاییه‌تی ئه‌کات، باس له‌ خه‌ون و گه‌ڕانی مرۆڤ ده‌کات به‌ره‌و حه‌قیقه‌ت...ڕاستگۆیی و وه‌ فاداری جه‌مسه‌ری سه‌ره‌کی شانۆییه‌که‌ن، که‌ تێهه‌ڵکێش کراوه‌ به‌ چه‌ند دیمه‌نێکی کوردی خۆڕسکانه‌.
له‌م به‌رهه‌مه‌دا هه‌موو که‌سه‌کان دوورن له‌ خوودی ڕاسته‌قینه‌ی خۆیان،‌ هه‌وڵ ئه‌ده‌ن سیمای ڕاسته‌قینه‌ی خۆیان بزر بکه‌ن، ته‌نها که‌سێک که‌ ڕووی ڕاستی کێشه‌کان ئاواڵا ده‌کات مرۆڤێکی دزه، ئه‌م ئه‌گه‌رچی دزه به‌ڵام ناشرینی کاره‌کانی خۆی ناشارێته‌وه‌، حه‌قیقه‌تی که‌سه‌ کانی تر ده‌رده‌خات، که‌ دوورن له‌ خوودی ڕاسته‌ قینه‌ی خۆیان  .
ئه‌م گروپه‌ تێکه‌ڵاو به‌ هونه‌رمه‌ندانی کورد و هۆڵه‌ندی و چه‌ند نه‌ته‌وه‌یه‌کی دیکه‌ ده‌یانه‌وێت، له‌ ڕێگه‌ی هونه‌ری شانۆوه‌ ڕووی جوانی که‌له‌پورو فه‌رهه‌نگی کوردی بناسێنین به‌ که‌لتوره‌کانی ڕۆژئاوا، هه‌روه‌ها به‌رهه‌می شانۆیی پێشکه‌ش جالییه‌ی کوردی و خه‌ڵکانی هۆڵه‌ندی و بێگانه‌کانی تر بکه‌ن.
ئه‌م ده‌قه‌ ساڵی 2013 له‌م شارانه‌ی هۆڵه‌ندا پێشکه‌شکران:
یه‌که‌م: ڕۆژی 23-03-2013 له‌ شاری ئارنێم.
دووه‌م: ڕۆژی 20-04-2013 له‌ شاری ئارنێم.
سێهه‌م: ڕۆژی 11-05-2013 له‌ شاری ئه‌پڵدۆرن.
چواره‌م:ڕۆژی 25-05-2013 له‌ شاری لیواردن.
پێنجه‌م: ڕۆژی 14-06-2013 له‌ شاری ئه‌مستردام.
له‌ پاڵیدا به‌‌ سازدانی که‌شێکی که‌لتوری هه‌مه‌ڕه‌نگ تێکه‌ڵاو به‌ هونه‌ری گۆرانی و مۆسیقای کوردی له‌ ڕازاندنه‌وه‌ی هونه‌رمه‌ند حه‌مه‌ به‌کری کلارنێت به‌شداری تێدا کرد.
(دارفۆ) نوسه‌ری ئیتالی له‌ ئه‌وروپادا هه‌میشه‌ به‌ نوسه‌رێکی یاخی ناسراوه‌‌ و زۆرجار به‌شێوه‌ی کۆمیدی دیده‌کانی خۆی ئاواڵه‌ ده‌کات، وه‌ک باسمان کرد خاوه‌نی خه‌ڵاتی نۆبڵه‌ و ئه‌مساڵیش وتاری ڕۆژی جیهانی شانۆی نووسیبوو.
ئه‌کته‌ره‌کانی گروپی شانۆی بێسنور فره‌که‌لتوورین، مۆسیقای ئه‌م کاره‌ له‌لایه‌ن هونه‌رمه‌ند حه‌مه‌ به‌کره‌وه‌ ئاماده‌ کراوە. لە نواندنی هەریەک لە ‌"ئێبلین ڤیلسۆن، سته‌یڤان هیدما، کۆڤان ڕامسدۆنک، هێنک پێن، نێتی هارمسه‌، هاوژین به‌ختیار، ئێڤیه‌ ڤان دێر سخۆت، بێن ئێخرمۆنتده‌ر، جه‌نته‌ڵ مارتیس"، گرافیک له‌ لایه‌ن هونه‌رمه‌ند (حه‌مه‌ نه‌وڕه‌س)ه‌وه‌.
باکۆ سۆرانی ده‌رهێنه‌ری ئه‌م نمایشه‌ ئه‌ڵێ: بۆ یه‌که‌م جاره من شانۆی کۆمیدی ده‌رئه‌هێنم ..ئه‌م شانۆیی یه شانۆگه‌ریه‌که، که‌ له‌گه‌ڵ خه‌نده‌دا، مانایه‌کی فه‌لسه‌فی مه‌زن ده‌خاته‌ ڕوو، ئه‌ویش کرۆکی خودی مرۆڤ و پاپه‌ندبوونیه‌تی به‌ده‌وروبه‌ره‌وه‌.
شایانی باسه‌ له‌ ناوه‌ڕاستی ساڵانی نه‌وده‌کانه‌وه‌ یانه‌ی کوردی "میدیــا" له‌ هۆڵه‌ندا، به‌ هه‌موو به‌شه‌کانیه‌وه‌ له‌ گه‌لێک شاره‌کانی هۆڵه‌ندا هاوکار و پشتیوانی ئه‌م گروپه‌ی کردووه‌. له‌ دوا نمایشیاندا ڕۆژی 14-06-2013 له‌ شاری ئه‌مستردام به‌ ئاماده‌بوونی زیاتر له‌ 80 که‌س له‌ کورد و هۆڵه‌ندی و نه‌ته‌وه‌کانی دیکه‌ له‌ شه‌یدایانی شانۆ، بینه‌ری ئه‌م شانۆگه‌ریه‌ بوون و جێگه‌ی ڕه‌زامه‌ندی و دڵخۆشیان بوو.. له‌ کۆتاییدا له‌ لایه‌ن ئازاد خالید لێپرسراوی ناوه‌ندی ده‌ره‌وه‌ی ڕێکخراوه‌ دیموکراتیه‌کان(ی.ن.ک) و مه‌به‌ست جه‌عفه‌ر خه‌یات ئه‌ندامی کارگێڕی پلاتفۆڕمی کوردی له‌ هۆڵه‌ندا، چه‌پکه‌ گوڵی سوپاس و ده‌ستخۆشیان به‌ گروپی شانۆی بێسنور پێشکه‌ش کردو گفتی هاوکاری و پشتگیری خۆیانیان بۆ دووپات کردنه‌وه‌.
بۆ زانیاری زیاتر ده‌رباره‌ی گروپی شانۆی بێسنور سەیری ئەم لینکەی خوارەوە بکە:


http://debatcentrumdebres.nl/agenda/single/?tx_ttnews[tt_news]=263&cHash=654b7c70b5201b465d4f72690b346cd9