CHRA.TV

Voorbeeld-HTML-pagina

ئامادەبووانى ئێستا 37 میوان

شانۆی كوردی وڵاتێكی داگیر كراوە

حەیدەر عەبدولڕەحمان: شانۆی كوردی لە هەلو مەرجی ئەمڕۆكەدا وەك وڵاتێكی داگیر كراو دەبینم ، ئەوانەش كە حاكمی ئەو وڵاتە داگیر كراوەن ، قۆرخ كارێكن كە لە سەرەوە دروشمی بریقەدار بەرز دەكەنەوەو خۆیان بە خەمخۆری شانۆ نیشان دەدەن ، كەچی لە ژێرەوە خوێنی شانۆیەك دەمژن .. كە بە دەست ئەو داگیر كەرانەوە ، سوكایەتی پێ دەكرێ ، لە قودسیەتی خۆی رووت دەكرێتەوە

..

ئەو جۆرە گەندەڵیانەی كە بە چەندین شێوەی جۆراو جۆرەوە وەك فایرۆسێك خزاوەتە نێو جەستەی شانۆ، سەرچاوەكەی هەر تەنها ئەو داگیر كارو مشەخۆرانە نین كە شانۆیان كردووە بە ئامرازێك بۆ گەیشتن بە ئامانجە بازرگانیەكانی خۆیان بەڵكو ئەوانەشن كە بۆ پاراستنی بەرژە وەندییە تایبەتیەكانی خۆیان رێ خۆشكەرو هاندەرن بۆ خۆش كردنی زەمینەی قۆرخ كردنی شانۆ ، ئەوانیش لەو بازنە نەخشە بۆ كێشراوە بەدەر نین و زنجیرەیەكی بە یەك بەستراون لەو پرۆسە نەخشە بۆ كێشراوەی قۆرخ كردنی شانۆ، كە وا دەكەن دەرگای سەخاوەت بۆ هەندێك بخەنە سەر گازەرەی پشت و قفڵو كلیلیش بۆ چوونە ژوورەوەی هەندێكی دیكە لێ بدەن و هاوكێشەی بانیكەو دوو هەوا پیادە بكەن ..
بێ شك دەرەنجامەكانی ئەو قۆرخ كردنە باجەكەی هەر ئەوەندە نیە كە لە پەنای شانۆوە كەسانێك هەن خۆیان دەكەن بە پاڵەوانی سەر تەختە بۆ هەموو سەردەمەكان و لە رێگەی هەندێ مەهزەلەی شانۆییەوە پشكی شێر هەڵدەلۆشن ، لەوە سەخت و دژوارتر ئەوەیە كە ئەوەندەی دیكە مەودای نێوان شانۆو بینەر درێژترو سەخت و دژوارتر دەكەین و ئەوەندەی دیكە متمانەی بینەر لە دەست دەدەین و لە بەهاو قودسیەتەكانی شانۆ كەم دەكەینەوە ... لێرەوە رەهەندەكان پەیوەست دەبن بە پرسە ئەخلاقیەكان و ئاستی ئەخلاقیەتی شانۆكارەكان دەبنە پێوەر ، ئەوەتا ئەوانەی بەرژەوەندییە تایبەتیەكانی خۆیان لەسەروی هەموو شتێكەوە دادەنێن باكیان بەوە نیە كە دەردی شانۆ گرانتر دەبێت یا سوكتر ، باكیان بەوەش نیە كە بینەر لێیان رازی دەبێ یاخود نا .. كەسێكی وەك منیش چیان لە سەر دەنووسێ و كۆمەڵگا بە چی ناوزەدیان دەكات .. گرنگتر لە هەموو ئەوانە ئەو دەسكەوتەیە كە ئامانجی سەرەكی ئەوانە لە شانۆدا .
لەو نێوەندەدا كە شانۆ بەو شێوەیە كۆت و پێوەندی دەخرێتە گەردەن و رێگاكانی گەیشتن بە شانۆ دوور دەكەوێتەوە ، لاوە شانۆكارەكان و تیپە شانۆییەكان دەبنە زەرەرمەندی یەكەم ..
ئەوەتا لە پەنای ئەو پڕكێش پڕكێشەی قۆرخ كردنی شانۆدا بە دەگمەن دەبینی كە لاوەكان ئەو دەرفەتەیان بۆ برەخسێ بتوانن بەرهەمەكانی خۆیان نمایش بكەن ، تیپەكان بە شێوەیەك بە پەراوێز دەخرین كە ئاستەم بێت بتوانن لە بوارێكدا چانسی خۆ نیشاندانیان بەركەوێت .. هەر كاتێ داوای ئیش بكەیت هەزارو یەك پاساو لە بەردەمتدا قیت دەبنەوە ، روو بە رووی هەزارو یەك تەنگژەی ئابووری و دارایی و نەبوونیت دەكەنەوە ، كەچی هەر لەو نێوەندەشدا بودجەی وا بۆ هەدێ مە هزەلەی شانۆیی تەرخان دەكرێت كە رەنگە بودجەی چوار كاری شانۆیی بێت .
ئەوە نیە لە ئەنجامی ئەو واقیعە تاڵەی شانۆ و لەژیرو زەبرو زەنگی نا عەدالەتی لە كار كردن و رەخساندنی دەرفەت بە دەیان تیپی شانۆیی داخران ، بە دەیان هونەرمەندی پر لە توانست و پر لە ئەشقی شانۆ دەستیان لە كاری شانۆیی هەڵگرت ؟
كوا بەرهەمە جوانەكانی نیهاد جامی بۆ لە كەركوك و هەولێرو سلیمانی نابینن ؟ كوا گۆران عەلی كەریم بەو هەموو دەسەڵاتە شانۆییەی خۆیەوە بۆ لە سەر تەختە نابیندرێت ؟ كوا سدیق حوسێن ـ ی گەورە داهینەر لە كوێیە ؟ بۆ دەرفەتەكان بۆ سوود لە توانست و دەسەڵاتی هونەریی گەنجێكی شانۆكارو پڕ لە ئەزموونی وەك دیار عومەر نەبێت ؟ بۆ كارە شانۆییەكانی كارۆخ ئیبراهیم و مەهدی حەسەن و كرمانج مستەفا بە ساڵ بێت ؟ بۆ دەیانی وەك ژیلوان تاهیر لە شانۆ بتۆرێن ؟ ئەو پرسیارانەو دەیان پرسیاری دیكە كە رەنگە قۆرخ كارو داگیر كارەكانی تەختەی شانۆ نەیانەوێت گوێ بیستی بن ..چونكە هێنانە پێشەوەو هاندانی ئەو گەنجانە مەترسی بۆ لەرزاندنی كورسیەكانیانە ..
ئیدی كەس نازانێ كورسی ئەو قۆرخ كارانە لە چی دەچێت ، من وەك جەستە مۆمیاكراوەكەی فیرعەونیان دەبینم كە ئەگەر خۆشیان لە ژیاندا نەمان ئەوە پێویستە لە ئایندەدا جەستەی ئەو حاكمانەی شانۆ لە سەر كورسیەكانیانەوە مۆمیا بكرێت .. تا كەسێ نەبێ لە ئایندە شوێنیان بگرێتەوە ، خۆ تەمەنی مانەوەی ئەو حاكمانە لە سەر كورسیەكانیان لە مانەوەی فیرعەونیەكانەوە كەمتر نیە لە دەسەڵات .