CHRA.TV

Voorbeeld-HTML-pagina

ئامادەبووانى ئێستا 38 میوان

دوونمایشی شانۆیی گروپی شانۆی بێسنور له‌ ئه‌مستردام پێشکه‌ش کرا

له‌ درێژه‌ی کاروچالاکیه‌کانی یانه‌ی کوردی "میدیــــا" له‌ هۆڵه‌ندا، رۆژی یه‌کشەممە رێکەوتی15-06-2014به‌ کۆمه‌کی ناوه‌ندی ده‌ره‌وه‌ی ڕێکخراوه‌ دیموکراتیه‌کانی (ی.ن.ک) گروپی شانۆی بێسنور، له‌ یادی 20 ساڵه‌ی دامه‌زراندنیدا، دوونمایشی شانۆیی له‌ هۆڵی شانۆیی

(Oostblok theater) له‌ ئه‌مستردام پێشکه‌ش کرد، به‌ ئاماده‌بوونی ژماره‌یه‌کی زۆری جه‌ماوه‌ری هونه‌ردۆستی کورد و هۆڵه‌ندی.

سه‌ره‌تا هونه‌رمه‌ند حه‌مه‌ به‌کری کلارنێت چه‌پکێک میوزیکی کوردی و چه‌ند سرودێکی نیشتمانی وه‌ک (هۆکاکی پێشمه‌رگه‌ و خۆشم ئه‌وێ نیشتمانه‌که‌م)، به‌ هۆی ئه‌و ڕووداوه‌ دڵته‌زێنانه‌ی ئه‌م دواییه‌ی کوردستانه‌وه‌ پێشکه‌ش کرد.

ناونیشانی شانۆگه‌ریه‌ هۆڵه‌ندیه‌که‌ به‌ ناونیشانی (پارچه‌یه‌ک بچووکی شه‌تره‌نج)‌ و شانۆگه‌ریه‌ کوردیه‌که‌ به‌ ناونیشانی (ئێرە ماڵی منه)، نمایش کرا.

شانۆگه‌ری یه‌که‌م له‌ نوسینی نوسه‌ری هۆڵه‌ندی (پیته‌ر مارانس)ه‌ و ڕێژیسوور:باکۆ سۆرانی. ناوه‌ڕۆکی شانۆگه‌ریه‌که،‌ باس له‌ژیانی کچێک ده‌کات، له‌گه‌ڵ باوکه‌ ده‌وڵه‌مه‌نده‌که‌ی ژیان به‌سه‌ر ئه‌بات، ژیانێکی بێگه‌رد که‌ هه‌موو جوانییه‌کانی گه‌ردوون کۆئه‌کاته‌وه‌، باس له‌ ساده‌یی ژیانی ڕۆژانه‌ ئه‌کات، به‌ڵام ئه‌م ساده‌ییه‌ گه‌ڕانێکه‌ به‌دووی دۆزینه‌وه‌ی مرۆڤی ئاساییدا، ئه‌و مرۆڤه‌ی به‌دووره‌ له‌ داپۆشینی ڕووخساری ڕاسته‌قینه‌ی خۆی و خۆی ناخاته‌ نێو وازی و گه‌مه‌ی سه‌رده‌مه‌وه‌، باوکی ده‌وڵه‌مه‌ند... کچه‌که‌ی ئه‌خاته‌ ناو یارییه‌کی گه‌وره‌ی شه‌تره‌نجه‌وه‌، ئه‌یه‌وێت به‌ هه‌ر نرخێک بێت، کچه‌که‌ی یارییه‌که‌ بباته‌وه،‌ به‌بێ حساب کردن بۆ هه‌ست و نه‌ستی کچه‌که‌ی. لێره‌وه‌ سه‌ربه‌ستی تاک زه‌وت ئه‌کرێت و باوکێک، که‌ هێمایه‌ بۆ دیکتاتۆرێتێکی تاکی هاوچه‌رخ له‌ ڕێگه‌ی مێدیا و  به‌ گاڵته‌ و گه‌پی سوریالی پاکی ژیانی کچه‌که‌ی زینده‌ به‌چاڵ ئه‌کات، له‌ کۆتاییدا، هه‌موو هه‌ڵوێسته‌کان پێچه‌وانه‌ ده‌بێته‌وه‌.

دووه‌م: شانۆی (ئێرە ماڵی منه)‌ له‌ نووسین و ده‌رهێنانی سامان ژین، ئه‌م چالاکییه‌ به‌شێکه‌ له‌ پڕۆژه‌ی یه‌کی گه‌وره‌ی شانۆی بێسنور، که‌ ماوه‌یه‌که‌ به‌رده‌وامه‌ به‌ ناوی پڕۆژه‌ی ( گه‌ڕه‌کی که‌لتووری) ئه‌م پڕۆژه‌یه‌ پڕۆژه‌یه‌کی فره‌که‌لتوورییه‌ بۆ دروستکدنی پردی که‌لتوری و ئاشنا کردن و نزیک کردنه‌وه‌ی که‌لتوره‌ جیاوازه‌کان له‌ یه‌کتری و به‌رجه‌سته‌کردنی پڕۆسه‌یه‌کی بێسنور، شایانی باسه‌ هه‌مان شانۆگه‌ری له‌ ساڵیادی 26 ساڵه‌ی ئه‌نفالدا ڕۆژی 13-04-2014 له‌ شاری لاهای پێشکه‌ش کرابوو‌ .

سامان ژین ئه‌ڵێ:ماوه‌یه‌که‌ ئه‌مه‌وێت له‌گه‌ڵ گروپه‌که‌مدا کارێکی کوردی پێشکه‌ش به‌ کۆچبه‌رانی کورد بکه‌م، من ئه‌م شانۆییه‌م نووسیووه،‌ که‌ باس له‌ به‌سه‌رهاتی ژنێکی گوندنشین  ئه‌کات له‌ پرۆسه‌ی ئه‌نفالدا، که‌ چه‌نده‌ها جار ده‌سه‌ڵات ڕاپێچیان کردووه‌، به‌ڵام ئه‌ و سه‌رله‌نوێ ماڵه‌که‌ی ئاوه‌دان ئه‌کاته‌وه‌، ئێمه‌ پێمان خۆشه‌ ڕووداوی گه‌له‌کی خۆمان به‌ کوردانی له‌دایک بووی ئێره‌ بناسێنن و‌ هاوکات‌ ڕێز له‌ که‌سه‌ ئه‌نفال کراوه‌کانمان بنێین و به‌م نه‌وه‌ نوێیه‌ی تاراوگه‌ی بناسێنین، بۆیه‌ ئه‌م به‌رهه‌مه‌یان پێشکه‌ش ئه‌که‌ین. ئه‌م کاره‌ پێکهاتێکه‌ له‌ هه‌ندێ مه‌نه‌لۆژ و دیالۆژ و جوڵه‌ شانۆیی،  ئه‌م کاره‌ بۆ سه‌کۆی شانۆ ئاماده‌نه‌کراوه،‌ به‌ڵکو شانۆی لۆکه‌یشنه‌ و ئه‌توانری له‌ هه‌موو لۆکه‌یشنێک گوزارشت بکرێت، له‌ نواندنی باکۆ سۆرانی، ڤییان که‌مال، لندایاکۆپسه‌، کلیاکه‌م و ئێبی ڤیڵسخۆتن.

گروپی شانۆی بێسنوور تێکه‌ڵاو به‌ هونه‌رمه‌ندانی کورد و هۆڵه‌ندی و چه‌ند نه‌ته‌وه‌یه‌کی دیکه‌ ده‌یانه‌وێت، له‌ ڕێگه‌ی هونه‌ری شانۆوه‌ ڕووی جوانی که‌له‌پورو فه‌رهه‌نگی کوردی بناسێنین به‌ که‌لتوره‌کانی ڕۆژئاوا،  هه‌روه‌ها به‌رهه‌می شانۆیی پێشکه‌ش کۆچبه‌رانی کورد و خه‌ڵکانی هۆڵه‌ندی و بێگانه‌کانی تر بکه‌ن.

ده‌قی یه‌که‌م‌ ساڵی 2014 له‌م شارانه‌ی هۆڵه‌ندا پێشکه‌شکرا بوون:

یه‌که‌م: ڕۆژی 15-03-2014 له‌ شاری ئارنێم.

دووه‌م: ڕۆژی 10-05-2014 له‌ شاری لیواردن.

سێهه‌م: ڕۆژی 23-05-2014 له‌ شاری ئه‌پڵدۆرن.

چواره‌م: ڕۆژی 15-06-2014 له‌ شاری ئه‌مستردام.

تیپی شانۆی بێسنوور گرووپێکی فره‌که‌لتووری هه‌مه‌ڕه‌نگه‌ له‌ نێوان نه‌ته‌وه‌ جیاوزه‌کانی هۆڵه‌ندا،‌ له‌ ساڵی 1994 ه‌وه‌ واته‌  20 ساڵه‌ خزمه‌ت ده‌کات، بۆ ناساندنی کلتوری کوردی به‌ هۆڵه‌ندی و بێگانه‌کانی ناو هۆڵه‌ندا.

شایانی باسه‌ له‌ ناوه‌ڕاستی ساڵانی نه‌وده‌کانه‌وه‌ یانه‌ی کوردی "میدیــا" له‌ هۆڵه‌ندا، به‌ هه‌موو به‌شه‌کانیه‌وه‌ له‌ گه‌لێک له‌ شاره‌کانی هۆڵه‌ندا هاوکار و پشتیوانی ئه‌م گروپه‌ی کردووه‌. له‌ دوا نمایشیاندا ڕۆژی 15-06-2014له‌ شاری ئه‌مستردام به‌ ئاماده‌بوونی زیاتر له‌ 80 که‌س له‌ کورد و هۆڵه‌ندی و نه‌ته‌وه‌کانی دیکه‌ له‌ شه‌یدایانی شانۆ، بینه‌ری ئه‌م شانۆگه‌ریه‌ بوون و جێگه‌ی ڕه‌زامه‌ندی و دڵخۆشیان بوو.. له‌ کۆتاییدا  دیاری ناوه‌ندی ده‌ره‌وه‌ی ڕێکخراوه‌ دیموکراتیه‌کان(ی.ن.ک) له‌ ڕێگه‌ی چه‌ند خاتوونێکی دیاره‌وه‌، به‌ڕێزان‌(ڕێزان مه‌حمود)، وه‌ک که‌سوکاری شه‌هید و قوربانی چه‌کی فۆسفۆر و هونه‌رمه‌ندی میللی شێوه‌کار حاجی خانم ئه‌مین و زه‌هره محه‌مه‌د عه‌لی له‌ده‌سته‌ی سه‌رپه‌رشتی کۆمه‌ڵه‌ی خوێندکاران و لاوانی کوردستان له‌ هۆڵه‌ندا، پێشکه‌ش به‌ هونه‌رمه‌ندان باکۆ سۆرانی و حه‌مه‌ به‌کری کلارنێت و سامان ژین کرا، له‌ کۆتاییدا سه‌ردار فه‌تاح ئه‌مین په‌یامی ئازاد خالید لێپرسراوی ناوه‌ندی ده‌ره‌وه‌ی ڕێکخراوه‌ دیموکراتیه‌کانی (ی.ن.ک)ی بۆ ئه‌م گرووپه‌ دووپاتکرده‌وه‌ و سوپاسگوزاری و ده‌ستخۆشی هه‌ڤاڵانی خۆی پێ ڕاگه‌یاندن و گفتی هاوکاری و پشتگیری هه‌میشه‌یی پێدان.

بۆ زانیاری زیاتر ده‌رباره‌ی گروپی شانۆی بێسنور ده‌توانن سەیری ئەم لینکەی خوارەوە بکەن:

http://theaterzondergrens.nl/