CHRA.TV

Voorbeeld-HTML-pagina

ئامادەبووانى ئێستا 59 میوان

هۆنراوە

کەی تێدەگەن

کەی تێدەگەن
دارستانێکی چڕ و پڕ
وەکو باخچەی بەرماڵ نییە
ئاسمانێکی پڕ لە هەور
وەك ئاسمانی ساماڵ نییە

کەی تێدەگەن
قاقای پێکەنینی جەللاد
وەکو بزەی مناڵ نییە
ناسکی گوڵ
وەك تیژی دڕك و داڵ نییە

کەی تێدەگەن
ئاوازی چریکەی بولبول
وەکو هاژەی رووبار نییە
دوعای شێخ بۆ برینی قووڵ
وەکو دەستی نوژدار نییە

کەی تێدەگەن
تروسکایی ئەستێرەیەکی دوورەدەست
وەك بلێسەی،
پشکۆی نێو ئاگردان نییە
جوتیارێکی رەنجدەر هەرگیز
وەکو دارلەدەستی کوێخا،
ملشۆڕ و سەرگەردان نییە

کەی تێدەگەن
هيچ سوتانێك
لە تاریکی
وەك سووتانی چرا نییە
هيچ ئازارێك
لە تاریکی
وەك ئازاري
قامچي دەستي برا نیيە

هۆگر ڕەواندزی
١٨.٩.٢٠١٣